〈跈上跈下〉
親不親 血脈親
自出世 經成長 到壯年 至成家立業
雙肩㧡起 對家庭个職責
上有雙堂 下有嫩子
每儕人个 經歷過程 都共樣
有人辛苦 煞猛 打拼 都還未必舒適安定
有人命靚 好運 幸福 交腳閒尞日仔照過
係好係壞 一言難定論 好壞本就係相對論
靚媸無比止 就看摎麼人比
中意較慘死 死苦合意執性
大環境 大命運 大八字 大地理
先天个 交分天 後天个 靠自家
細細仔 跈爺跈哀 跈上跈下 像跈龍
慢慢欸 日漸發育長大 有自家个朋友
愛離開屋下 愛出外讀書 愛學交朋結友
時間經過三十年後
大个大 老个老 畢竟時序个推移 從無停止
過去个 跈上跈下
現下个 載上載下
係動物性 乜係人性
出去聽 出去看 多聽多看
換一種空間環境 多一樣思考方式
都市个生存態度 鄉庄个生活命觀
賺錢个方式 消費个方式
服務他人 摎 為他人來服務
因爭你來 涯正有服務就業个機會
歡送你去 涯真誠執禮希望再過來
消費者 毋係大老爺 學做高水準个人客
接待者 毋係低一級 學做專業服務至尊
人人 生而平等受尊重
錢銀 係支付个工具 並毋係買賣交易
尊重 係基本个態度 並毋係誰大誰小
〈水流長〉
食共條水个上屋伙房，西河堂林屋，就落腳起屋在東片山排下。過等日出早䟘巡田水，開始欸逐日逐日農莊生活个日常作息，一直愛等斷烏日落時節，正會㧡㧡擔擔來轉屋。一日到暗就係恁樣，耕山耕園耕坵田，頭戴笠嫲背向天，顧屋顧餐顧家人，期待子弟出頭天。
客家女性——阿婆阿姆大嫂大姐老妹這兜儕，都無多話个認分又宿命，總知愛煞猛做事、老實做人，天公爺一定毋會空過你。勞力勞動力係大農業社會个本德，萬萬毋敢奢想愛有話語權摎經濟權。今晡日个涯，在家從父、嫁出從夫、夫死從子，對上愛有孝家官家娘，還愛擔起傳宗接代耕田降子个責任，對下愛養育教育一群大細，雙肩承受等个有形無形壓力，乜算係有重不輕哦！
阿香姨，係姐公姐婆个一個｢嘍竇女｣。從今推算當年，大約欸怕有完百年前恁久哩。這故事个由來，乜係聽阿姆生前，倆子哀在
亭仔下坐尞講嘴時節，講來講去無意中講出來个，說者無意聽者有心。話講該當時，姐公姐婆係仰般惜又仰般有心，驚就驚分上家下屋鄰舍講，反正別人个子弟揇過來个，毋係自家身下出个，無盡惜，乜係人之常情。
有一擺，香姨講出嘴，想愛去轉妹家一轉。照家規一定愛先同世大人講一聲，雖然係，近近欸兩十分个行路腳程，乜共樣愛先講，等大人點頭應好後，正開始來款包袱。就在這央時，姐公有交代，先摎該領出外著个布紐仔衫，洗淨晾燥再過拿去榻榻米底下矺平來，天光日轉妹家好著。
總算，等到五更雞啼天普光，掀起榻榻米，拿出該領有布紐仔布絆仔、老實合大方个靚衫，擐好等路手信，就好來去嘍。臨出發前，姐公佢，又特別將香姨身項个該恁多粒布紐仔、布絆仔，整正來挷襯來，一切無他，都為了愛分人看到整齊又萋躍个鄉庄細阿姐，來轉妹家哩。見面好印象，分人揇過去个該頭，日仔怕過來勉勉欸呦，看厥个外表就知，來印證古諺語所講，｢先敬衣裳後敬人｣。
客家男性做人爺仔儕，盡少乃至於毋識聽著，對子弟講出一聲涯愛你。但普遍將心意化作行動，一舉一止之間，會像山壢該條山溪水，流流流流日夜流，父愛子爺情，會係剪毋斷、訴不盡个點點滴滴山坑水。姐公香姨布紐衫，堪比水流長、長流水。
為了保護您的權益，「三民網路書店」提供會員七日商品鑑賞期(收到商品為起始日)。
若要辦理退貨，請在商品鑑賞期內寄回，且商品必須是全新狀態與完整包裝(商品、附件、發票、隨貨贈品等)否則恕不接受退貨。
