商品簡介
★台南文化獎、南瀛文學獎、聯合報報導文學獎得主黃文博，最新穿越時空力作！
★閩客文學獎得主、電台主持人黃之綠，溫暖朗讀！
這是一首，台江的詩。
佇沙崙出世的鳥鼠仔草，沿著海岸線輾過數百年，一代湠一代。
看著台江對大海成做內海，閣對內海成做水路、魚塭仔佮湳仔地，最後佮陸地相連；嘛看著運河開通，引著船隻出入，連結城市佮世界……
遮是變化萬千的大地布景，有船仔、有鳥仔，閣有一窟過一窟的塭仔！
遮嘛是數百年來的自然電影院，有戰場、有魚場，嘛有一代飼過一代的鹽埕！
作者簡介
【作者簡介】
黃文博，作家、詩人、教育家、攝影家，臺南「鹽分地帶」井仔腳人，國小校長退休，臺灣民俗、信仰佮臺文研究者，總共寫過百外本冊；長期擔任文化部佮縣市民俗審議委員、國藝會佮臺南美學館輔導委員，協助大臺南幾若項民俗通過國家級文資登錄；長期主持大臺南文化叢書規畫，超過兩百本，為「南瀛學」、「臺南學」建立系統性的基礎工程。曾經得著南瀛文學獎、聯合報報導文學獎、教育部本土語言傑出貢獻個人獎、鄭福田生態文學獎臺語詩首獎、臺南文化獎（2025年）等等。
這本冊是伊第一擺用臺文寫予國小學生看的繪本，文字如詩，詩如畫景，有土地的歷史感，嘛有文學的美感，佮一種囥佇咱心肝頭的性命力。
【繪者簡介】
李顏，彰化人，有兩隻貓，平面設計與插畫家，也是全職媽媽，愛亂跑，喜歡臺灣南部，人生已超過大半時間都在高屏地區打滾，守備範圍即將擴增至大台南地區，很高興來到地球體驗人生。
彰化人，有兩隻貓仔，平面設計佮插畫家，嘛是全職媽媽，愛烏白走，佮意臺灣南部，人生大部份的時間攏佇高屏地區走傱，跤跡已經踏來到大臺南，誠歡喜來到地球體驗人生。
【語音朗讀】
黃之綠，本冊作者黃文博的查某囝。師大台文所肄業；教育部台語認證專業級、成大台語認證專業級；捌做過台語教育報編採、國家語言發展會議台語口譯。這馬是漁業廣播電台的播音員。
序
【序】
若欲了解台灣的海洋文化，台江是一个真好的起點。
幾百年來，台江內海是台灣南部重要的海洋門戶。船仔來來去去，人佇海邊仔討海、曝鹽、作穡，嘛佇這片土地釘根生湠，慢慢形成庄頭，發展出特殊的信仰佮生活。綴時間咧行，海佮土地直直變化，內海變做水路、魚塭、鹽埕佮湳仔地，今仔日閣佮城市、運河連做伙。台江的變遷，嘛記錄著人佮海洋相依相倚的故事。
《阮兜蹛台江：鳥鼠仔草的時光旅行》，是一本用台江做主題的故事繪本。這本冊的作者黃文博老師，毋但是作家、台語詩人，嘛是教育家，捌做過國小校長，長期投入台灣民俗、信仰佮台文研究。
這擺，黃文博老師用優美閣有詩意的台文，予一欉生佇台江海邊的鳥鼠仔草做故事的主角。伊綴風四界去旅行，陪伴台江行過幾百年的歲月，看著海佮土地的變化，嘛看著船仔、庄頭、魚塭、湳仔地佮城市沓沓仔形成。
透過鳥鼠仔草的目睭，台江的歷史變做一段親近、會當斟酌想的旅行。囡仔會當佮伊做伙看海、看土地，按故事內底了解台江，嘛感受人佮海洋深深的連結。全冊用台文書寫，閣配合台語朗讀，予土地的語言佮聲音自然流入閱讀的世界。
誠懇推薦逐家拍開這本冊，佮鳥鼠仔草做伙旅行。對台江出發，看著海，嘛看著土地；了解過去，嘛想咱的未來。
願風繼續吹，水繼續流，台江的故事一代一代傳落去。
國家海洋研究院
院長 陳璋玲
