第一章（漢字板）
我六歲个時、有一擺去看着一本描寫原始樹林个册、册名是《大自然个真故事》、內底有一幅誠氣派个圖。只幅圖畫个是一隻大隻莽蛇當塊吞動物。頂面着是只幅圖个Copy。
册內底寫講『大莽蛇連哺刀無哺、着共歸隻个動物吞落去、了後店店困六個月个眠來共動物消化。』
喜拵、密周周个樹林內底只欵恐怖个代志乎我直直想、尾手手賤着舉一枝彩色个鉛筆、畫我個人个頭一幅圖。我个第一幅圖着像下面按呢。
我共我个圖展乎大人看、閣問因講只幅圖咁有共因惊着？
因朗應我講「一頂帽仔有省好惊个？」
我畫个不是一頂帽仔。是一隻莽蛇當塊消化一隻象。爲着卜乎大人了解我个意思、我着共莽蛇个腹內嗎畫出來。大人定定朗愛人解說歸大堆。我个第二幅圖着像按呢。
叱个大人朗苦勸我講、共看會着甲看袂着腹內个莽蛇喜二幅畫藏レ。共興趣轉向地理。歷史。算術。甲文法叱去。着是按呢、治我六歲个時、着放棄畫家只種者高尚个事業。只二幅圖个失敗乎我真失志。大人對代志不八講一下仔着了解、定定朗愛對因直直解說。此對囝仔來講、真忝。
不即我選別欵頭路、去學駛飛行机。世界各所在我差不多朗飛過唖。無不着、地理對我真有路用。干焦目周影一下、我着有法度分講是China也是Arizona。人那治暗時尋無路、此百面好用。
治人生个過程中、我甲一大堆嚴肅个人店店塊鬥陣。我治大人个中央生活者久。斟酌共因觀察。對因个見解無改變。
當冬我𫔘着一个看起來有略仔恰靈性个大人、着將我不時保存个第一幅圖共伊試。想卜知影講伊咁真正有智慧。不閣定定朗共我應講「此是一頂帽仔。」續落我着無甲伊講莽蛇。原始樹林。也是天星个話題。順伊个話、甲伊講Bridge。講Golf。講政治。講Necktie。了後喜个大人着真歡喜講會凍熟事一个者有話講个人。
Tē it chiuⁿ (Lô-má-jī pán)
Góa la̍k hòe ê sî, ū chi̍t pái khì khòaⁿ tio̍h chi̍t pún biâu-siá goân-sí chhiū-nâ ê chheh, chheh miâ sī Tāi Chū-jiân ê Chin Kò͘-sū, lāi-té ū chi̍t pak chiâⁿ khì-phài ê tô͘. Chit pak tô͘ ōe •ê sī chi̍t chiah tōa chiah bóng-chôa tng teh thun tōng-bu̍t. Téng-bīn tō sī chit pak tô͘ ê Copy.
Chheh lāi-té siá kóng, “Tōa bóng-chôa liân pō͘ to bô pō͘, tō kā kui chiah ê tōng-bu̍t thun •lo̍h •khì, liáu-āu tiām tiām khùn la̍k kò goe̍h ê bîn lâi kā tōng-bu̍t siau-hòa.”
Hit chūn, ba̍t chiuh chiuh ê chhiū-nâ lāi-té chit khoán khióng-pò͘ ê tāi-chì hō͘ góa ti̍t ti̍t siūⁿ, bóe-chhiú chhiú chiān tō gia̍h chi̍t ki chhái-sek ê iân-pit, ōe góa kò-jîn ê thâu chi̍t pak tô͘. Góa ê tē it pak tô͘ tō chhiūⁿ ē-bīn án-ne.
Góa kā góa ê tô͘ tián hō͘ tōa lâng khòaⁿ, koh mn̄g in kóng chit pak tô͘ kám ū kā in kiaⁿ •tio̍h?
In lóng ìn góa kóng, “Chi̍t téng bō-á ū siáⁿ hó kiaⁿ •ê?”
Góa ōe •ê m̄ sī chi̍t téng bō-á. Sī chi̍t chiah bóng-chôa tng teh siau-hòa chi̍t chiah chhiūⁿ. Ūi tio̍h beh hō͘ tōa lâng liáu-kái góa ê ì-sù, góa tō kā bóng-chôa ê pak lāi mā ōe •chhut •lâi. Tōa lâng tiāⁿ tiāⁿ lóng ài lâng kái-soeh kui tōa tui. Góa ê tē jī pak tô͘ tō chhiūⁿ án-ne.
Hia ê tōa lâng lóng khó͘-khǹg góa kóng, kā khòaⁿ ē tio̍h kap khòaⁿ bē tio̍h pak lāi ê bóng-chôa hit nn̄g pak ōe khǹg •le. Kā hèng-chhù choán hiòng tē-lí, le̍k-sú, sǹg-su̍t, kap bûn-hoat hia khì. Tō sī án-ne, tī góa la̍k hòe ê sî, tō hòng-khì ōe-ka chit chióng chiah ko-sióng ê sū-gia̍p. Chit nn̄g pak tô͘ ê sit-pāi hō͘ góa chin sit-chì. Tōa lâng tùi tāi-chì m̄ bat kóng chi̍t ē-á tō liáu-kái, tiāⁿ tiāⁿ lóng ài tùi in ti̍t ti̍t kái-soeh. Che tùi gín-ná lâi kóng, chin thiám.
M̄ chiah góa soán pa̍t khoán thâu-lō͘, khì o̍h sái hui-lêng-ki. Sè-kài kok só͘-chāi góa chha-put-to lóng poe •kòe •a. Bô m̄ tio̍h, tē-lí tùi góa chin ū lō͘-iōng. Kan-taⁿ ba̍k-chiu iáⁿ •chi̍t •ē, góa tō ū hoat-tō͘ hun kóng sī China iā sī Arizona. Lâng nā tī àm-sî chhōe bô lō͘, che pah bīn hó iōng.
Tī jîn-seng ê kòe-thêng tiong, góa kap chi̍t tōa tui giâm-siok ê lâng tiām tiām teh tàu tīn. Góa tī tōa lâng ê tiong-ng seng-oa̍h chiah kú. Chim-chiok kā in koan-chhat. Tùi in ê kiàn-kái bô kái-piàn.
Tng-tang góa tú tio̍h chi̍t ê khòaⁿ •khí •lâi ū lio̍h-á khah lêng-sèng ê tōa lâng, tō chiong góa put-sî pó-chûn ê tē it pak tô͘ kā i chhì. Siūⁿ beh chai-iáⁿ kóng i kám chin chiàⁿ ū tì-hūi. M̄ koh tiāⁿ tiāⁿ lóng kā góa ìn kóng, “Che sī chi̍t téng bō-á.” Sòa •lo̍h góa tō bô kap i kóng bóng-chôa, goân-sí chhiū-nâ, iā sī thiⁿ-chheⁿ ê ōe-tê. Sūn i ê ōe, kap i kóng Bridge, kóng Golf, kóng chèng-tī, kóng Necktie. Liáu-āu hit ê tōa lâng tō chin hoaⁿ-hí kóng ē tàng se̍k-sāi chi̍t ê chiah ū ōe kóng ê lâng.
為了保護您的權益，「三民網路書店」提供會員七日商品鑑賞期(收到商品為起始日)。
若要辦理退貨，請在商品鑑賞期內寄回，且商品必須是全新狀態與完整包裝(商品、附件、發票、隨貨贈品等)否則恕不接受退貨。
