第五十屆青年文學獎得獎文集

文學獎文集，得來不易。

不止文集，本屆文學獎徵文比賽的籌辦過程亦困難重重。身處後疫情時代的我們，發現保有藝術的能動性比想像中難。

青文成立於 1972 年，見證香港浮沉，有賴各位文學愛好者的支持，才能走過半世紀。
感謝每一屆投稿者，令大眾每每打開青文文集時看見不同層面的時代史。但青文最該感謝的還是一眾評審，一直以來都以微薄的薪酬為我們批閱大量文稿。

遵循往屆評審建議，今屆徵文比賽並無更改比賽規例，僅增加得獎者獎金，以及評審微薄的薪酬。幸運的是，今屆有一千八百篇來稿，每篇得獎作品都各具特色。

值得一提的是，本屆粵語小說組別終於迎來非本港地區的參賽作品。來自內地的參賽者榮獲優異獎，證明當初青年文學獎開設該組別能達推廣粵語文學的意義，反映粵語運用不受地域所限的主張。

未來青文不知會如何發展，但多說無益，不如打開文集，看看時代縮影。

編者/譯者/繪者簡介


青年文學獎協會成立於一九七二年，是一個文學推廣組織。為鼓勵青年創作，協會堅持舉辦一年一度的徵文比賽，比賽亦一直獲海內外人士踴躍支持。作家評審評選出優秀作品後，出版得獎文集，為年輕作家提供途徑晉身文壇。

多年來，青年文學獎協會一直致力促進大眾對文學的認識。除舉辦公開徵文比賽外，更定期舉辦一系列關於文學藝術的講座、工作坊、作家指導計劃、文社及文學創作研習室等，加強大眾與作家的創作交流。

3 序
6 第五十屆青年文學獎投稿數據

小小說公開組
10 冠軍 〈寧寧〉 | 林嘉洋
13 亞軍 〈螂心如鐵〉| 戴劍韜
15 季軍 〈第二十二個人〉 | 張欣怡
18 優異獎 〈列車沒有駛進來〉 | 黃創筠
21 優異獎 〈後遺〉 | 三金
24 優異獎 〈洗頭〉 | 林翠羽
27 優異獎 〈蘿蔔湯〉 | 王素怡

翻譯文學公開組
32 原文 Lionel Giles | John Minford
36 冠軍 〈談《孫子兵法》與英譯者〉| 葉蕊菱
40 亞軍 〈翟林奈與《孫子兵法》英譯本〉| 繆子衡
46 季軍 〈《孫子兵法》與它的西洋伯樂〉| 褚文韜
51 優異獎 〈漢學泰斗的不朽譯本〉| 梁安淇
56 優異獎 〈翟林奈:歷久常新的漢學典範〉| 鄭子健
61 優異獎 〈翟林奈與《孫子兵法》〉| 雪堇
66 優異獎 〈論翟林奈與孫子兵法〉| 周文康

兒童文學公開組
72 冠軍 〈回不了家的灰刺蝟〉| 林以晝
76 亞軍 〈我決定為你起個名字。〉| 馬正源
82 季軍 〈小妖唧唧呱〉| 夏槳
86 優異獎 〈十號風波〉| 林曉敏
92 優異獎 〈上網有問題?〉| 陳詠雯
96 優異獎 〈虹霓地〉| 海月榕
100 優異獎 〈小鵝安安甜品店〉| 張逸詩

文學評論公開組
106 冠軍 〈陳映真小說的聲音書寫與情感政治〉| 易文傑
115 亞軍 〈論陳楸帆〈開竅

粵語小說公開組

冠軍：鄭思珩

得獎作品：〈野豬〉

地區：香港

〈野豬〉

嗰段時間，阿發最鍾意嘅地方，係距離學校十五分鐘路程嘅一個向陽山坡。呢個山坡係佢細個時無意中發現嘅，由學校過去，要橫過幾條冇紅綠燈嘅馬路，再沿住引水道向上行十分鐘。
阿發鍾意呢度嘅原因，係因為陽光透過樹影曬落時，山坡上嘅溫暖程度總係啱啱好，瞓喺到咩都唔駛諗，聞住空氣裡面濃郁嘅樹葉同果實氣味，係佢最舒服嘅時刻。阿發帶人生第一個朋友家聲嚟嘅時候，非常自豪，仲特登搵嚟唔同堅果畀佢做零食，務求營造一個舉世無雙嘅烏托邦。
有日晏晝，阿發獨自喺山坡上瞓著咗。忽然遠處傳嚟嘅一陣氣味將佢嘈醒──新鮮香甜的蔬果味裡面，混雜住三個學生的汗味。阿發低頭，長鼻貼近地面，根據氣味傳嚟嘅方向沿山坡下行，四蹄踩落滿山枯葉時，沙沙聲響，好似山林傳達最私密嘅耳語。
就快落到山腳時，阿發就見到嗰三個熟悉嘅面孔。「過嚟，有嘢益你。」平頭高大嘅男學生大叫。
聽到佢嘅叫聲，阿發信以為真，跑得更加快，突然失足，一下跌咗落泥水氹入面，成身污糟邋遢。三個男學生肆意狂笑：「肥豬真係肥豬。」戴眼鏡嘅學生將兩個爛熟蕃茄揼向阿發，最終浸落水氹。三個學生調頭跑走，對兩邊嘅響咹聲置之不理，笑聲響遍馬路。
阿發身上嘅鬃毛變哂泥水色，佢伸出前蹄，嘗試企起身但又再跌倒。
當時嘅阿發冇諗過，呢個被人嘅叫聲吸引、不斷奔跑然後一再跌倒嘅過程，就預示咗佢往後嘅宿命。

每個人嘅一生，總會識得一兩個叫肥仔嘅人。阿發就係芸芸肥仔嘅其中一個。
最初「肥仔」係一個褒義嘅名，親戚或者鄰居成日捏住佢塊面，笑住咁同佢講：「阿發肥嘟嘟咁，真係個好得意嘅肥仔啊。」但係所有嘅詞彙，最終都會隨住成長而衍生另一層意義。
肥仔嘅本名，同暱稱一樣平凡──何潤發。從「潤發」兩個字，唔難感受到阿發父母最初對佢嘅期許，但阿發偏偏姓「何」，無可避免令佢嘅人生籠罩住疑問、唔肯定，甚至嘲諷嘅意味。
阿發冇見過自己嘅親生媽媽。喺阿發五歲嘅時候，阿爸帶咗一個陌生女人返屋企，話係阿發新嘅阿媽。一聞到女人身上嘅玫瑰香水，阿發就打咗個大乞嗤。
記憶中，阿媽身材高挑，成日著長裙，好似其他親戚咁捏阿發塊面，叫佢肥仔時，從來都唔笑，淨係會話：「點解你老豆老母生著你呢嚿肥仔？」後來阿媽個肚愈嚟愈大，之後就喺醫院抱咗阿妹翻嚟，面上開始多咗笑容。
野豬喺群體入面嘅階層，依照食奶嘅次序而定：母豬橫瞓喺地，對身下爭鬥視若無睹，而所有肚餓嘅豬仔，為咗果腹，就要搶住母豬奶水最多嘅乳頭，大力咬實，不斷吸食。
阿發同阿妹，就係兩隻不斷爭食嘅豬仔，喺阿媽面前努力吸引佢嘅注意，暗地裡充滿較勁，而永遠都係由阿妹搶到奶水最豐盛嘅乳頭，吸吮唔放，一邊用天真爛漫嘅笑容，嘲笑阿發嘅無用。
至於阿爸，唔駛出去搬貨嘅日子，就留喺屋企飲酒賭馬，身上總係留有一陣酒味，逢親賭錢輸咗，就攞阿媽出氣。阿發十三歲，有日放學，一開門就見到阿媽執緊行李，雙手微震，地下散佈被掃跌嘅雜物。佢執完行李之後，望咗阿發一眼，嘆咗口氣：「你自己好好照顧自己。」講完呢句，就一手拖住阿妹，一手拉住行李離開。之後阿發冇再見過佢哋。
從此以後，阿發鍾意喺出面遊蕩多過返屋企。佢有一個只有自己知道嘅秘密基地，就係學校附近嘅一個向陽山坡。佢成日瞓喺草地，感受陽光喺樹葉之間穿過，最期待嘅時刻，係山坡上偶然會見到野豬經過──有時係一隻公豬，有時係母豬帶住兩隻豬仔。野豬繞過樹木，見到人時會警戒抬頭，之後繼續低頭覓食。
喺呢個遠離馬路嘅地方，人同豬各有自己嘅空間，彼此有默契咁保持距離。
有人喺動物身上見到自己嘅另一面，所以成為貓奴，或者鍾意養狗、倉鼠、鸚鵡，而阿發對野豬嘅鍾愛勝過其他生物。第一次見到野豬時，阿發怕野豬會攻擊佢，郁都唔敢郁，後來發現，其實只要佢唔行近，野豬根本冇興趣理佢。於是每當野豬經過，阿發就成為咗風景嘅一部分，坐喺遠處觀察佢哋嘅一舉一動。

阿發年紀越大就生得越肥，喺學校成日畀同學叫肥仔，家聲係唯一唔會咁樣叫佢嘅人。
家聲喺三兄妹入面排第二，哥哥係學生會會長，妹妹中三就考到八級鋼琴，家聲成績中等，又係音樂白癡，最叻就係打籃球。佢父母成日話，運動叻邊有用，都係學吓阿哥阿妹，努力讀書考入大學啦。但家聲唔鍾意讀書，亦都唔鍾意返屋企，放學之後就拉阿發去打波，或者換件衫偷入機舖、借人身份證買酒。
每次阿發畀人恰，家聲都企喺佢嗰邊。學校有三個男學生成日整蠱阿發，直至阿發識咗家聲，幾個男學生一走嚟取笑佢，家聲一定鬧返佢哋轉頭。後來三個學生就冇再嚟騷擾佢。
「阿發，你要大膽啲，有時你慣咗一樣嘢，可能成世都改變唔到。」家聲曾經咁同阿發講。佢成日帶阿發周圍去，唔嫌佢肥仔。作為阿發第一個朋友，家聲亦係唯一去過阿發秘密基地嘅人。
阿發返嘅第一份暑期工，就係家聲介紹，喺茶餐廳到搬嘢、落單、由廚房攞嘢食出嚟。同家聲一齊返工嘅日子，日見夜見，對阿發嚟講，就好似只係學校生活嘅延續。
有次食晏，家聲望住個空杯，用飲筒攪入面嘅冰：「阿發，你第日想做啲咩？」
「唔知喎，我咩都唔識，有人請都偷笑。」
「學校入面個個都話要做醫生、做老師、做工程師，係你咁冇出色。」家聲笑嘅時候，望住個空杯，好似同緊自己講嘢。「你冇諗過，自己最鍾意做嘅嘢係咩㗎咩？」
阿發冇答。
幾個月之後，放榜成績出爐，阿發同家聲都考唔到大學最低門檻，原本疊埋心水出嚟做嘢，但過咗冇幾耐，家聲有日突然話，屋企人要送佢去外國讀書，問都冇問過佢意見。
阿發羨慕：「你就好啦，我連飛機都未搭過。」
家聲飛嗰日，阿發同幾個朋友一齊去送佢。但到家聲入閘飛埋，阿發仲未分到佢究竟係去歐洲定澳洲。

野豬求食，可以企喺人嘅腳邊，任憑餵食者用各種語言呼喝，依然將頭垂落地面，吞食一切揼落地面嘅殘渣；亦可以蜂擁而上，喺大馬路上橫衝直撞，咬爛所有裝滿食物嘅容器，幾分鐘內清晒所有碎屑。
阿發成年之後，同其他公豬一樣，開始咗離群索居嘅生活。每日早出晚歸，重複一樣嘅舉動：將鼻伸落泥土，向住食物嘅方向挖泥覓食嘅時候，阿發就沉浸喺自己嘅世界，務求用各種辦法滿足生來龐大嘅食慾。填飽個肚之後，就騎上母豬交配，流滿成身汗，然後返竇大覺瞓。
祖哥成日笑阿發：「你個肥仔，唔係食就搵女人，做嘢唔見你咁勤力。」
阿發畢業之後做裝修學徒，祖哥係老世。祖哥平時對下屬好好，成日請佢哋食飯，又揸車載佢哋北上揼骨，佢身型瘦弱矮細，就好似一隻食極唔肥嘅野豬，但喺豬群入面往往嗌得最大聲，性格急躁，手腳又快。每次阿發只要跟唔上進度完工，祖哥就一定鬧到佢狗血淋頭，句句夾雜粗口。呢個時候，阿發只能夠答：「係我錯，係我錯。對唔住祖哥，下次唔會。」然後將頭垂得極低，幾乎貼住地面。
鬧阿發嘅人唔止祖哥，阿發初入行時，樣樣嘢都唔識──度尺度錯、牆紙貼唔好、鏟底收口冇次做得齊，幾乎所有客都鬧過佢。
阿發從來冇諗過自己會做裝修。以前暑期工喺茶餐廳做，搬嘢好簡單，伙計對佢又好，阿發以為返工就係咁，渾渾噩噩就一日，點知裝修咁難，成日畀人鬧，啲客用字仲難聽過粗口。
有次阿發自己一個做到夜晚，其他人早就走晒，但阿發未做好手頭上嘅嘢，驚畀祖哥鬧，唔敢提早收工。凌晨一點，佢坐喺便利店出面，灌咗支水，濁親，眼淚都流埋出嚟，突然有一種所有嘢已經無法返轉頭嘅挫敗感。以前，阿發從來唔會諗命運、生活意義有關嘅嘢，淨係會諗下一餐去邊到食、今晚去邊個女人張床到瞓。呢次係佢第一次有咁嘅諗法。
佢又買咗罐啤酒，飲到一滴不剩，然後慢慢行返屋企。
野豬對人定下嘅邊界冇任何概念。有個夏天，打風前夕，天氣特別翳焗，一隻蕩失路嘅小野豬闖入私人會所嘅游池，嗰度嘅水比天空更加湛藍，佢跳入去，以為係大海，四條短蹄用力踢啊踢，希望游到對岸，但中途就被麻醉槍射中，失去意識被拖返上岸。
阿發都曾經闖入唔應該踏足嘅空間。跟祖哥做咗四年，已經習慣將頭貼落地面求食嘅狀態，畀祖哥、畀客鬧成為咗日常。阿發冇再諗生活意義，因為當一群野豬爭奪僅有嘅食物，就要心無旁聱向前狂衝，咬住食物唔好放口。阿發嘅工作一單接一單，休息時間成為咗奢侈品，就算曾經有一刻動過離開嘅諗頭，都冇停落嚟思考嘅精力同時間。
嗰年暑期，啱啱做完一單工作，個客唔滿意阿發嘅手工，當住佢面鬧咗成個鐘。天都黑晒，阿發終於返到屋企，喺樓下見到一個熟悉嘅人。
家聲同以前有啲唔同──高咗、冇戴眼鏡、染咗頭髮，但外表嘅變化之外，家聲有更大嘅唔同，阿發講唔出係咩。
「返嚟幾日，依家先約到你，你份工係咪真係咁忙。」兩人去大排檔食飯、飲酒，好似返咗去讀書時無憂無慮嘅日子。家聲畢業之後，喺外國某間電台搵到份工作，過埋暑假就正式返工，今次特登返嚟香港見吓屋企人同朋友。
家聲睇落開朗咗，成日笑。「阿發，你依家返緊嘅工係咪你鍾意做嘅嘢？」
「搵食啫，有咩鍾唔鍾意，興趣又唔可以當飯食。」
「點解你講嘢咁似我老母。」見阿發個杯空咗，家聲幫佢倒滿啤酒。「喺外國讀書，識親嘅人都好堅持要做自己鍾意做嘅嘢，點解喺香港好似特別難。」
「香港人生活壓力大嘛。」阿發夾緊塊椒鹽豬扒落碗，講呢句嘅時候，順其自然，根本唔需要思考。
「你又冇去過外國生活，點知人哋壓力大唔大？」
又多幾杯落肚，兩人開始微醉。阿發終於透露，其實自己想辭職好耐，但唔知點同祖哥開口，又驚入其他行搵唔到食。
家聲語氣平淡：「記唔記以前讀書，你成日畀人蝦，嗰陣我點同你講？如果你習慣，咁就一世㗎喇。」
食完嘢之後，兩人醉到面都紅晒，阿發諗起嗰日鬧過佢嘅客，忽發其想，凌晨沿後門貨𨋢偷上個客屋企。「還掂佢都唔鍾意，不如我幫佢喺傢俬、喺埲牆到畫幾筆。」喺𨋢入面，阿發同家聲密謀嘅時候，兩個人都笑到彎腰。
結果上到個客屋企，望住一間新裝修好嘅單位，阿發最終都係落唔到手。
幾日之後，個客打畀祖哥，話屋企有嘢唔見咗，翻查閉路電視見到阿發當晚上過佢屋企，要求賠錢，唔係就報警。阿發幾乎用哀求嘅聲音同祖哥講，佢嗰晚咩都冇做，亦都冇偷過任何嘢。但祖哥為免搞大件事，賠咗錢畀客。同一日，阿發就畀人炒咗魷魚。

阿發成半年搵唔到嘢做。嗰段時間，佢喺交友程式識咗程程。程程髮長及肩，低沉嘅聲音帶點頹廢，同身上散發嘅強烈玫瑰味香水，兩種睇落矛盾嘅元素，喺佢身上巧妙咁結合。程程好少笑，成日望住窗出面，好似期待緊一個突如其來嘅衝擊，能夠將所有嘢重歸於零。
程程年紀比阿發大十年，兩人第一次見面，約喺一間日本餐廳。阿發一推門，迎面同佢講「依啦西乜蛇」嘅侍應，面上露出極度殷勤嘅笑容，就令阿發有種預感，覺得自己同即將要見嘅女人格格不入。
阿發對程程嘅第一印象係：四肢修長，透過黑色背心裙凸出嘅乳房，有稍微下垂嘅傾向。食飯過程中，兩人最深入嘅話題，只係問對方嘅職業，其餘話題無關緊要──講吓電視上某位明星嘅八卦、食過最好食嘅餐廳，但從來冇提起自己嘅家庭、朋友，甚至過去拍拖嘅次數。
兩人第一次做愛，程程坐喺阿發身上，前後擺動嘅身體、面上扭曲嘅表情，睇上去好似一隻見到食物而飛奔嘅母豬。一諗到咁，阿發就莫名其妙咁勃起，舉起兩隻短蹄，搖動尾巴，張狂露出獠牙。完事之後，兩人瞓喺床上，一直保持沉默，直到程程起身離開。
阿發同程程每隔幾星期見一次，每次嘅行程都一樣：食飯、做愛，平時甚少交流，彼此似乎有道默契：一旦有人試圖觸碰雙方之間嘅無形界線，關係亦會隨之瓦解。
春末，阿發搵到一份清潔工作，返工地點就喺佢中學附近。
由裝修過渡到清潔，阿發曾有幾個夜晚，攝高枕頭想像自己嘅前路，但一望住空白嘅天花板，思緒往往就開始煥散。佢追溯過去，未能搵到任何帶有激情嘅瞬間。無所事事地坐喺山坡，望住野豬經過，已經係佢有過嘅最大快樂。
做清潔嘅薪金不比以前，但經過漫長嘅空窗期，阿發只打算過得一日得一日。佢喺廠房返工，一星期返六日，同事年紀比佢大好多，但唔會好似以前祖哥同啲客咁鬧佢。返工時，大家見面時偶有交流，一到放工就各自四散，亦唔會好似之前份工咁約埋食飯。
大概呢種距離，先至係同事之間嘅正常工作關係。
作為新人，阿發被編排做厭惡性工作自然不在話下。每日放工前，佢都要將廠房上下嘅大型垃圾袋抬去垃圾房。垃圾房潮濕翳焗，混雜而成嘅氣味令人敬而遠之。偏偏阿發最期待就係工作嘅呢一環。
每到傍晚六點，都會有同一個婆婆嚟垃圾房接收紙皮。婆婆對阿發特別好，話佢似自己移咗民個仔，間中就擺低架車仔同阿發傾計，問佢有冇女朋友、返工辛唔辛苦、諗住幾時結婚。其他同事都話：「個阿婆係咁多嘢講，肥仔你趕收工唔駛睬佢喎。」但係一畢業就出嚟租地方住嘅阿發，平時慣咗自己一個，冇人會對佢問東問西。
婆婆架車仔有時會掛住一袋麵包，話用嚟餵附近山頭嘅野豬。婆婆已經唔止一次被漁護署職員票控，經過嘅人見到佢，都對佢指手劃腳：「你愈餵，啲野豬繁殖得愈快，盞搞到我哋，又令到啲地方污糟邋遢。」
「我唔餵瞓唔著㗎。」婆婆私底下同阿發講。「豬仔跟住阿媽，阿媽唔食嘢，邊有奶餵豬仔。」
有時阿發會諗，以前中學喺山上見過野豬，會唔會都曾經食過婆婆留下嘅麵包？

見到野豬嗰晚，婆婆嚟收紙皮時，賴低車仔，又同阿發寒暄：「阿發搵到女朋友未？中秋無謂孤伶伶過。」
阿發諗起細個時，最期待就係中秋節，阿爸會買月餅返嚟，成家四個孖份食。
月餅入面嘅橙黃色鹹蛋黃，係阿發至愛。但呢一刻，聯同鹹蛋黃而浮現嘅，係幾星期前嘅一幕：有日，程程突然約阿發出嚟，話有重要嘢同佢講。約出嚟食飯時，程程神色怪異，成餐飯心不在焉。食完後，阿發正打算好似平時咁去時鐘酒店，程程就喺呢個時候，同佢講咗自己懷孕嘅消息。
母豬橫瞓喺地，對身下爭鬥視若無睹，而所有肚餓嘅豬仔，要搶食奶水最多嘅乳頭──呢一幕，阿發總係每隔一段時間就會記起。最初佢係吸吮奶水嘅豬仔，後來，則係旁觀，繼而遠離嘅公豬。
程程後來將肚內豬仔落咗，之後冇再搵過阿發。
婆婆推車仔離開後，阿發搞掂埋垃圾房嘅手尾，一陣窸窸窣窣嘅聲音後背後傳來，佢擰轉身，同喺垃圾房外經過嘅一隻公豬打照面。公豬有一對短細獠牙，雙耳不斷撲動，行過時步伐悠閒。
人豬對視一眼，公豬繼續走過，阿發繼續處理手上嘅垃圾，趁野豬冇注意時偷偷留意佢，正如以前喺山坡上咁。
城市係一個想像出嚟嘅概念，正如城郊之間，係一道想像嘅邊界，只有被排斥嘅生物知道呢一點，而維護嘅人則唔相信。阿發收工，行出垃圾房時，一群著制服嘅人就企喺對面馬路。佢哋一見到阿發，一人伸出食指指向佢，兩人手持盾牌，始終同阿發保持距離。
阿發不明就裡，繼續向屋企方向行，打算沿途搵嘢食。行到馬路附近，一個女人攞住袋乾糧要賣畀阿發，阿發聞一聞，毫無興趣，正諗住前行，忽然一個繩網迎頭罯落，先見兩個人正左右夾攻，要將阿發捉住。
阿發未知咩事，掙脫繩網向前跑，著制服嘅人喺身後大叫：「隻豬走甩咗！」
跑入樹叢隱身，阿發見到追捕佢嘅人離開，挨住樹幹喘氣。天漸黑，阿發個肚咕咕聲，又唔敢行出去，唯有喺樹下刨土，睇吓有無可放落口嘅食物。佢無力再行，攤出四肢趴喺地面，一時將鼻舉高，不斷嗅索。
夜深，忽然聞到一陣模糊隱約嘅食物氣味，阿發聽到外面人聲漸息，就將鼻貼住地面行走，喺街燈照射下見到一個橙啡色嘅蓮蓉月餅。
佢四蹄交接，向住月餅方向直衝而去，咬下第一啖時先至發現，自己已成為咗捕獵者嘅籠中物。

評語：

冠軍作品《野猪》的靈感，或受啟於野猪在香港城市出沒的素材，作品結合粵語寫作，語言文筆細膩、流暢，結合香港城市的特質，有創意地塑造了一人猪真偽莫辨的小說文本，不無後現代的色彩。
小說一段文字頗值得思考：「城市係一個想像出嚟嘅概念，正如城郊之間，係一道想像嘅邊界，只有被排斥嘅生物知道呢一點，而維護嘅人則唔相信。」到底是「只有被排斥嘅生物知道呢一點」，還是只有「維護的人」才知道這一點？對野猪來說，它由「郊外」到「城市」，才被城市守護者視之為「越界」，需要搜捕驅離。而野猪在野外，則是沒有問題的。與其說城郊是想像出來的概念，不如說是相對「異」而有意建構出來的概念。由此思考人和猪的物種概念，其實也是建構出來的。故人和猪，都是作者的投射，則野猪阿發和人類何潤發，相異又相類，而何潤發喜歡到郊外的「野」，不也是人的自我放逐？由此思考人類阿發之結局(若真的有的話)，這個頭腦天真簡單的他最後被誘捕，似乎象徵了「功利」城市對他/它格格不入而生的懲罰。即小說最後言及想像出來的城郊，或花更多筆墨來書寫，主題應更深刻突出。

故事的粵語書寫，運用於香港背景的故事內容，尤為能配合所要寫重情節。野豬與人的經歷交疊，於同樣的地方，面對同樣的事，串連同樣的角色，生活流過，似在寫人，也在寫豬，究竟人和野豬有何分別？引發更多深層的思考。

能夠抓住近年香港有關野豬的新聞為題材，透過頻繁地平行對比野豬阿發和肥仔阿發，暗示人豬命運的相似和連繫。開首以野豬的視角度開始敘述有驚喜，一方面以擬人的方或寫豬的內心，另一方面以豬寫人，呈現人在社會和個人生活的際遇。幾次寫人豬相見，處處修辭雙關，能在粵語寫作上實驗這種細緻的鋪墊和設計，故事節奏明快俐落，作品成熟而極有心思。