商品簡介
台南市建城四百年，府城風光、語言文化，是遮爾優美高雅，徛佇這塊土地，阮感受榮耀、歡喜佮意，向望為母語的傳承，盡一份心、出一份力。
我創立「臺南市台語文化班學會」推展台語，深耕到社區，自我要求課程愛符合社會、貼近生活，以實用為主、提升文學程度為輔，鼓勵學員參加教育部台語認證，提證書表示脫離母語青盲牛的證明，領紅榜單感受母語的榮光。阮嘛以身作則做示範，佇各區上課了後，用台語記錄上課的過程囥上面冊抑是迷眾頁，用四句聯貫串課程主題佮活動，描寫當工的重點佮情境，配合上課的畫面，成做早安圖卡，會當回顧，嘛會使佮親情好友相借問，因為有四句聯文字佇圖卡，所以會使傳播台語文化，順紲展現台語文學的新意境，誠淺白、足生活化。
我自107.1.19開班以來，逐工的早安圖卡四句聯，傳送民間社會、學員群組已經八冬外，避免後代走揣，趁這時落文字記錄流傳，共最近這三冬的四句聯蒐集篩選，分做九大類別，數量篇章倚欲四百首，加相片通好看圖講故事體會詩境，加賞析註解，當做小品文消遣人生，掃瞄QR-code聽詩句綴讀綴唸無問題，冊傷厚無利便，所以分做二本，冊名《講予伊鬥句：台語三百首～情境四句聯》、《講予伊紲拍：台語三百首～情境四句聯》兩本。
講台語媠閣奅，歡迎來讀冊，現流仔的課程，生活化講心情、實用化做記錄、趣味化笑談人生。
作者簡介
黃良成
國小校長退休了後，開始佇社區結合區公所辦理台語文化班，公益推廣，目前開拓十个行政區域，嘛成立「台語文化班學會」，擔任理事長兼班程講師。
作者自成立學會了後，鼓勵會員台語創作，編輯學員作品出版成冊，比如111年的《感恩啟帆》、112年的《再造前景》、113年的《向望繁華》。嘛為著證明台語會當書寫任何代誌，科學、醫學甚至是喙齒等等，特別共伊種齒的過程，開欲兩百萬的心酸苦痛，佇113年6月出版《種齒驚魂記》，得著濟濟的回響。
台語文化班開班已經第九年矣，暗時上課的合照加上課程活動的主題，構思情境四句聯，編輯做早安圖卡，欲傳承台語文化。如今，揀選最近這三年的四句聯，加賞析註解，選相片對應詩文，總共倚欲四百首，所以號名「台詩三百首～情境四句聯」，實在有相當的數量，所以出版分做兩冊《台語講予伊鬥句》、《台語講予伊紲拍》，向望會當提升社會人士的台語文化。
作者形容這兩本冊是現代褒歌，四句聯的形式，過去古早、民間口傳通俗的傳統褒歌，是愛保存，猶毋過，咱更加愛活佇現此時，這兩本冊是現代社會進行式，欲予社會人士感受台語的文雅，台語詩詞自來就毋是老古董，向望逐家做伙來享受。
目次
01 開結業篇：各區開結業、區長議員頒證
02 假日篇：南區、議長盃、朗讀會刊寫作
03 骨力篇：精進課程、風颱天、落雨上課
04 節日篇：母親父親節、中秋清明教師節
05 認證篇：團報、認證、紅榜
06 春聯篇：這馬上好、臺灣上勇、團拜過年
07 科技篇：手機APP、講座、新聞雜誌面冊
08 慶生篇：慶生、種齒、長官議員讀冊選舉
09 雜記篇：入會、參訪、永康搬徙、宣導
